Bawal na Pag-ibig

Prologue “S-Sorry, pero hindi na tayo pwede,” garalgal ang boses na sabi ni Aliah kay Krish, ang kanyang nobyo. Makikipaghiwalay na siya gaya ng sabi ng kanyang ina, kahit na masakit at napakahirap para sa kanya. “Ano?” Tinitigan ng matagal ni Krish si Aliah. “P-Pero Aliah, bakit?” hindi makapaniwalang tanong ni Krish sa nobya. “Basta. Umalis ka na please!” Umiyak na si Aliah. Ayaw n'yang gawin ito, labag ito sa kanyang kalooban ngunit kailangan n'yang gawin dahil hindi talaga sila pwede sa isa't isa. Mali ang pagmamahalan nila. “Teka.” Hinawakan ni Krish si Aliah sa magkabilang braso ngunit agad nitong winaksi iyon. “May nagawa ba akong mali?” Sunod-sunod na umiling si Aliah habang sapo-sapo niyang ang mukha ng kanyang palad. “Hindi tayo pwede. Kaya please… kalimutan mo na ako.” “A-Aliah… I can’t just forget you. I love you! Ano ba ang pinagsasabi mo? Akala ko ba okay tayo?” Kumibot-kibot ang labi ni Aliah habang tinititigan si Krish. Gustong gusto niya sabihin ang dahilan ngunit wala siyang masabi rito. Pakiramdam niya biglang naputol ang kanyang dila. “P-Patawad, Krish. Mali ‘to. Umalis ka na! Parang awa mo na!” “No! I don’t get it, Aliah! Akala ko ba mahal mo rin ako? Eh ano ‘to? Nasaan na ang pangako mo sa akin?!” Lalong kumirot ang puso ni Aliah nang makita niya ang pighati sa mga mata nito. Kanina pa niya ito gustong yakapin at aluin. Ni minsan ay hindi niya ginustong saktan ang lalaking mahal na mahal niya ngunit hindi ito nararapat. Tamang sundin niya ang kanyang ina. Dahil kahit anong gawin nilang dalawa ay mali ang pagmamahal na ibinibigay nila para sa isa't isa. Kaya para sa kanya, kay Krish, at sa kanyang ina ay gagawin n'ya ito. Maling-mali na ibigin n'ya ito. Dahil ang pagmamahal na mayroon sila ay isang BAWAL NA PAG-IBIG.